ხინოწმინდის საეპისკოპოსო ტაძარი

ხინოწმინდის საეპისკოპოსო ტაძარი აჭარაში, ქობულეთის მუნიციპალიტეტის სოფელ ხინოში მდებარეობს. იგი IX საუკუნით თარიღდება. დღესდღეობით ტაძარი მხოლოდ ნანგრევების სახითაა შემორჩენილი. ვახუშტი ბატონიშვილის ცნობით ეკლესია გუმბათიანი იყო, თუმცა დიმიტრი ბაქრაძე აღნიშნავდა, რომ ის აჭის ეკლესიას ჰგავდა, რომელიც უგუმბათოა. ტაძარი XVIII საუკუნეში, ოსმალების ლაშქრობის დროს დაზიანდა. 1873 წელს დიმიტრი ბაქრაძეს ნაგებობა ძალიან დაზიანებული დახვდა, მხოლოდ საკურთხევლის ნაწილი და ეკვდერი იყო გადარჩენილი, ფრესკები ჩამოცვენილი იყო. შემორჩენილი ნაწილები 1864 წელს განზრახ დაანგრიეს. ეკლესია კიდევ უფრო დააზიანა მიწისძვრამ, რომლის შემდეგადაც თითქმის ყველა კედელი დახეთქილა. საბოლოოდ კი ტაძარი ემილ ტარიელაძემ დაანგრია 1919 წელს, რათა ნაგებობის ქვები სახლის ასაშენებლად გამოეყენებინა. მას ლაზი ხელოსნები დაუქირავებია, რომლებსაც ტაძრის დანგრევა გაუჭირდათ და ის დინამიტით ააფეთქეს. მოგვიანებით მათ ეკლესიის ეზოში თიხის ქოთნით განძი უპოვიათ, რის შემდეგაც გაპარულან. ტარიელაძემ სახლის აშენება ვერ მოახერხა, ის მდინარე კინტრიშში დაიღრჩო.