ბათუმის ბოტანიკური ბაღის გოდერძის ალპური ბაღის მშენებლობა დაიწყო 2016 წელს ბათუმის ბოტანიკური ბაღის მიერ. ბაღი მდებარეობს მაღალმთიან აჭარაში, ხულოს მუნიციპალიტეტში, ქ.ბათუმიდან 112 კილომეტრში, ზღვის დონიდან 1859-1960 მ.მ. სიმაღლეზე, ფართობით 96344 კვ.მ- ია . ვიზიტისთვის სასურველი პერიოდი გახლავთ 15 მაისიდან 15 ოქტომბერის ჩათვლით.გოდერძის ალპური ბაღის ძირითად დანიშნულებას წარმოადგენს: კავკასიის ეკორეგიონის მაღალმთის მცენარეთა კოლექციის თავმოყრა, მცენარეთა კონსერვაცია, ეკო-განათლების ხელშეწყობა, სოფლად ტურიზმის განვითარება და სუბალპური ტყის ზოლის აღდგენა. ვიზიტორს შეუძლია ნახოს ბუნებრივად მოზარდი სუბალპური და ალპური ზონისათვის დამახასიათებელი მცენარეულობა და მცენარეთა ჰაბიტატების მრავალფეროვნება, კერძოდ: ტყის, ჭაობის, მდელოს, ტბის და მშრალი ეკოტოპის. ამჟამად ბაღის ტერიტორიაზე აღრიცხულია ველური ფლორის 50 ოჯახის, 111 გვარის 170 სახეობა. ბაღი დაყოფილია ზონებად: წიფლნარი- რომელიც გოდერძის ალპურ ბაღში გვხვდება ბუნებრივად. ბაღის მშენებლობის დაწყებასთან ერთად დაიგეგმა მისი ბუნებრივი სახით შენარჩუნება. ალპინარიუმი ე.წ.ქვის ბაღი ალპური ბაღების ძირითადი ელემენტია, რომელიც გულისხმობს ქვების ისე მოწყობას, რომ ახლოს იყოს ბუნებრივ გარემოსთან, შემდგომში მასში მცენარეების დარგვის მიზნით. ალპინარიუმში თავმოყრილი იქნება საქართველოს და კავკასიის მაღალმთის მშრალი ეკოტოპის მოყვარული მცენარეები.ბუნებრივი ტბა -რომელიც საზრდოობს წყაროს წყლით. ჭაობის ნაკვეთი -კი ბაღში წარმოდგენილია ბუნებრივი სახით. რეკრეაციული ზონა - მოიცავს ბაღის ტერიტორიის 25 %-ს, სადაც შესაძლოა დროის გატარება სუფთა, მოწესრიგებულ გარემოში ბუნების ულამაზესი პეიზაჟებით.წყარო და საპიკნიკე ზონა მოიცავს როგორც ღია და დახურულ ფანჩატურებს ისე ბუნებრივ წყაროს. კემპინგის კეთილმოწყობილი ზონა წარმოდგენილია ყველა საჭირო სერვისის უზრუნველყოფით (აქ შესაძლებელია კარვის გაშლა, ცეცხლის დანტება, ოღონდ სპეციალურად მოწყობილ საცეცხლურში და სხვა.) რაც შეეხება პანორამას, მაღალმთიანი აჭარისათვის დამახასიათებელი საზაფხულო იალაღებით, მდინარით და ტიპიური მთის სახლებით აღაფრთოვანებს მნახველს.