შუახევი

შუახევი

მანძილი ბათუმიდან: 65 კმ

ფართობი: 588 კვ/კმ

მოსახლეობა: 22.600 ათასი

www.shuakheni.ge

შუახევი მესხეთისა და შავშეთის ქედებზეა განლაგებული. ადგილობრივი მოსახლეობა, ძირითადად, დაკავებულია მიწათმოქმედებით, მეცხოველეობითა და თამბაქოს მოყვანით. ჭვანის ხეობა, მარეთი, ნიგაზეული, გომარდული, ხაბელაშვილები და ნენია შუახევის მუნიციპალიტეტის გამორჩეული სოფლებია, სადაც ადგილობრივ საოჯახო სასტუმროებში რამდენიმე დღით გაჩერებას და აქვე, ალპურ მდელოებზე ლაშქრობის მოწყობასაც შეძლებთ. ტყეებში მოგზაურობის დროს შესაძლოა შეგხვდეთ შველი, ტახი და ტურა, ასევე, იმოგზაურებთ ტიპურ კავკასიურ ფოთლოვან და წიწვოვან ტყეებში.

თუ შუახევში დასვენებას გადაწყვეტთ, აუცილებლად დააგემოვნეთ ტრადიციული აჭარული კერძები, რომლის ძირითადი ინგრედიენტი რძის პროდუქტებისგან შედგება და სთხოვეთ მასპინძლებს ამ კუთხისთვის დამახასიათებელი რამე განსაკუთრებული ადგილობრივი კერძი მოგიმზადონ.

ძირითადი აქტივობები:

1. მოაწყობთ ლაშქრობას ჯვარიმინდორის და ჩირუხის სამწყემსო სადგომებზე;
2. გასინჯავთ შუახევის თამბაქოს (თუთუნი) და დაეხმარებით სტუმართმოყვარე მასპინძლებს თუთუნის მოსავლის აღებაში;
3. მოინახულებთ ფურტიოს თაღოვან ხიდსა და ოთოლთას ციხეს;
4. იჯირითებთ ცხენით კავკასიურ ტყეში

ძირითადი მოსანახულებელი ობიექტები:

ციხესიმაგრეები: ნიგაზეული (XVIII); კავიანი (XII-XIII ); ოქროპირაული (XI-XII ); დარჩიძეები (XII-XII ს); ოთოლთა (XI-XIII ს); ჩანჩხალო (XII-XIII ); ცინარეთი (XI-XII ).
ხიდები: ხაბელაშვილების ხიდი (XIX ) და ვარჯანაულის თაღოვანი ხიდი (XII)
ოლადაურის ეკლესია

შუახევის მუნიციპალიტეტის სოფლებში პაპოშვილები და დარჩიძეები, ასევე, ჩირუხის მთაზე მდებარეობს საოჯახო სასტუმრო სახლები, სადაც შეძლებთ ღამისთევასა და რამდენიმე დღით დასვენებას, გაეცნობით ტრადიციული აჭარული სოფლის ყოველდღიურ ყოფა-ცხოვრებას, დააგემოვნებთ ადგილობრივი ნატურალური პროდუქტებისგან მომზადებულ უგემრიელეს კერძებს და მონაწილეობას მიიღებთ კულინარიულ მასტერკლასებში.
ღამისთევა სამჯერადი კვებით - 50 ლარიდან.

საფეხმავლო მარშრუტებია: ჭვანისა და მარეთის ხეობები, კავიანის ციხე, ასევე ხანგრძლივი მარშრუტი, რომელიც შუახევისა და ხულოს მუნიციპალიტეტებს აკავშირებს.

ტრანსპორტი:
მიკროავტობუსი ბათუმი-შუახევი, ბათუმის ცენტრალური ავტოსადგური (მაიაკოვსკის ქ. №1); მგზავრობის ღირებულება - 4-5 ლარი;
შიდა სასოფლო ტრანსპორტი კი გადის უშუალოდ შუახევის მუნიციპალიტეტის ცენტრიდან.