ბათუმი

ბათუმი, პატარა და მყუდრო ქალაქი - საქართველოსა და მთელი შავიზღვისპირეთის ერთ-ერთი მთავარი ტურისტული ცენტრია, რომლის განვითარების ტემპი გაოცებთ, კონტრასტები გაკვირვებთ, სიმწვანე კი გამშვიდებთ. თანამედროვე ინფრასტრუქტურა, ბრენდული თუ დაბალბიუჯეტური სასტუმროები და მრავალფეროვანი სერვისი, ქალაქის სტუმრებს დროის სასიამოვნოდ გატარებას ჰპირდება.

ყველაზე შთამბეჭდავი ბათუმური კონტრასტი- ზღვისა და მთების საოცარი სიახლოვეა. კავკასიონის მთებისა და შავი ზღვის ჰაერის სინთეზი განსაკუთრებულ ბრიზს და ულამაზეს პეიზაჟებს ქმნის. ასევე საოცარი კონტრასტია ძველი და თანამედროვე ბათუმის შერწყმა, პირველი- თავისი ვიწრო ქუჩებით, საუკუნოვანი სახლებით, ორიგინალური ეზოებითა და სამლოცველოებით, მეორე კი ცათამბჯენებით, თანამედროვე შენობებით, კაფე-რესტორნების დიდი არჩევანითა და სიჭრელით. ქალაქის მთავარი ღირსშესანიშნაობები ძველ ბათუმსა და ბათუმის ბულვარშია თავმოყრილი.

ყველა ამ აქტივობის გარდა, ბათუმის სანაპიროსთან ახლოს ბევრი ღირსშესანიშნაობა და ცნობილი ძეგლია, რომლის ნახვა დამსვენებლებისთვისაც საკმაოდ საინტერესოა. ასეთ ცნობილ ღირსშესანიშნაობას წარმოადგენს, მაგალითად, ერთ-ერთი ყველაზე ცნობილი კინეტიკური ძეგლი “ალი და ნინო”. ასევე, აუცილებლად სანახავია საოცრებათა მოედანზე მდებარე ანბანის კოშკი, საიდანაც ულამაზესი პანორამული ხედები იშლება ქალაქსა და შავ ზღვაზე.

ბათუმში საცურაო სეზონი, ძირითადად, მაისის ბოლოს იხსნება, როდესაც ზღვის წყლის ტემპერატურა 18°C-ს აღწევს, სეზონის პიკში ზღვა +27°C -მდე თბება. ჰაერის ტემპერატურა კი ზაფხულის თვეებში +24°C -+30°C -ია (ზოგჯერ მეტიც). ზღვაში ბანაობის შემდეგ, ბულვარის საუკუნოვანი ხეების ჩრდილში განტვირთვა და ფიჭვის, დაფნისა და ევკალიპტის ხეების ჟანგბადის სუნთქვა ნამდვილი ნეტარებაა. საღამოს კი - ბულვარის ხეივნებში ან 7 კილომეტრიან საველოსიპედო ბილიკზე სეირნობა და სანაპიროებზე მდებარე ბარებსა თუ ბუნგალოებში გართობა გელით.