ბათუმის არქეოლოგიური მუზეუმი

მუზეუმი

სარემონტო სამუშაოები

ბათუმის არქეოლოგიური მუზეუმი, რომელიც ცნობილი არქეოლოგის ამირან კახიძის სახელს ატარებს, წარმოადგენს ჩვენი ქვეყნის უმნიშვნელოვანეს სამეცნიერო, საგანმანათლებლო და კულტურულ კერას. ეს არ არის უბრალოდ საცავი, არამედ სივრცე, სადაც ათასწლეულების ისტორია ცოცხლდება. მუზეუმი განთავსებულია ჭავჭავაძის ქუჩის №77-ში, XX საუკუნის 50-იანი წლების დახვეწილი არქიტექტურული სტილის შენობაში, რომელიც თავისთავად უკვე ისტორიის ნაწილია. მუზეუმის საექსპოზიციო დარბაზები გთავაზობთ განუმეორებელ მოგზაურობას დროში, რომელიც მოიცავს: ქვის ხანის საწყისებს: ექსპოზიციის უძველესი განძი - ქვის იარაღები, რომლებიც აღმოჩენილია აჭარის მთიანეთში, კურორტ ბეშუმთან, და რომელთა ასაკი 300-400 ათასი წლით განისაზღვრება! წარმოიდგინეთ, რა მასშტაბის დროის მონაკვეთზეა საუბარი!რაც შეეხება ცივილიზაციის ცენტრს: გამოფენილი მასალა თვალნათლივ აჩვენებს, რომ აჭარის ტერიტორია იყო ის არეალი, სადაც დაახლოებით 10 000 წლის წინ დაიწყო რევოლუციური გადასვლა მიმთვისებლური მეურნეობიდან მწარმოებლურზე – ეს არის კაცობრიობის ისტორიის გარდამტეხი მომენტი. ოქრომრავალი კოლხეთის საიდუმლო კი მრავალფეროვანი არტეფაქტებითაა წარმოდგენილი ენეოლით-ადრებრინჯაოსა და, განსაკუთრებით, გვიანბრინჯაოსა და რკინის ადრეული ხანით (ძვ.წ. XV-VII სს). მუზეუმში იშვიათი კოლექციები ადასტურებს ფაქტს , რომ ჭოროხის აუზი წარმოადგენდა სამთო მეტალურგიის უძველეს ცენტრს ახლო აღმოსავლეთში და იყო კოლხური ტომობრივი კულტურის სამშობლო. სწორედ ამ რეგიონს უკავშირდება ცნობილი ბერძნული მითი არგონავტების შესახებ - ისტორია „ოქრომრავალი“ ქვეყნის შესახებ, რასაც მუზეუმის მდიდარი ოქროს ფონდი (კოლხური ოქრომჭედლობის ნიმუშებით) უპირობოდ ამტკიცებს!

ანტიკურ სამყაროსთან კავშირს მუზეუმში დაცული სამხრეთ-დასავლეთ საქართველოში (გონიო-აფსაროსი, ფიჭვნარი, ციხისძირი და სხვ.) ნახევარ საუკუნეზე მეტი ხნის გათხრების შედეგად აღმოჩენილი ნიმუშები მოგვითხრობენ,რომლებიც ანტიკურ სამყაროსთან მჭიდრო სავაჭრო-ეკონომიკურ და კულტურულ ურთიერთობებზე, ბერძნულ კოლონიზაციასა და რომაულ-ბიზანტიურ ექსპანსიაზე ექსპონატების საშუალებით საუბრობენ.

ექსპონატები მოიცავს: იმპორტული და ადგილობრივი წარმოების კერამიკას. დახვეწილ ტერაკოტულ ფიგურებს. ტორევტიკისა და საიუველირო ხელოვნების უმაღლეს ნიმუშებს. ფასდაუდებელ ნუმიზმატიკურ და გლიპტიკურ ძეგლებს (ოქროს, ვერცხლის, ბრინჯაოსა და რკინის). ბათუმის არქეოლოგიური მუზეუმი არის ადგილი, სადაც ისტორია ელოდება თავის აღმომჩენს.