დღესდღეობით ტურიზმი ერთ-ერთი ყველაზე სწრაფად მზარდი სფეროა მსოფლიოში. ქვეყანაში შემოსულ ვიზიტორთა უმეტესი ნაწილი ბუნებას, ჯანსაღ გარემოს, ტრადიციების, გასტრონომიის, კულტურისა და ისტორიის გაცნობას ითხოვს. სწორედ ყველა ეს კომპონენტი ქმნის სოფლის ტურიზმს.
აჭარის მდიდარი და მრავალფეროვანი ბუნება, უნიკალური ტრადიციები და კულტურა, ავთენტური გარემო, კულინარია და სტუმართმოყვარე მოსახლეობა სოფლად ტურიზმის განვითარების საუკეთესო პირობებს ქმნის. დაცული ტერიტორიები და აჭარის მრავალფეროვანი ტურისტული პროდუქტები ყველა ტიპის მოგზაურისთვის საინტერესო და მიმზიდველია. მაღალმთიან აჭარაში მოგზაურობით დაინტერესებულ ვიზიტორთა რაოდენობა ყოველწლიურად იზრდება.
სოფლის ტურიზმის საერთაშორისო კონფერენციის თემებიც სწორედ სოფლის ტურიზმის განვითარების პერსპექტივებს, მსოფლიოს სხვადასხვა ქვეყნიდან ხალხის მოზიდვასა და სოფლის ტურიზმის მიმართულებით მათ დაინტერესებას ეხება. მისი ძირითადი მიზანია, ასევე, სოფლის ტურიზმში ჩართული ადამიანების, მეწარმეების, საჯარო და კერძო სექტორების წარმომადგენელთა შეხვედრა-დისკუსია, ერთმანეთისთვის გაცნობა და გამოცდილების გაზიარება.
კონფერენციაში მონაწილეობას იღებენ როგორც ქართველი, ასევე უცხოელი ექსპერტები, საოჯახო სასტუმრო სახლების მეპატრონეები, ტურისტული სააგენტოები, სოფლისა და ეკო ტურიზმის სხვადასხვა სფეროს წარმომადგენლები, სამთავრობო და არასამთავრობო ორგანიზაციები და უწყებები. კონფერენციის ფარგლებში, 2 დღის განმავლობაში იმართება პრეზენტაციები, მოხსენებები, სემინარები და დისკუსიები, ეწყობა გაცნობითი და პრაქტიკული ვიზიტები აჭარის რეგიონის ტურისტულ მარშრუტებზე.
კონფერენციაში მონაწილეობა უფასოა, თუმცა აუცილებელია ელექტრონული რეგისტრაცია. კონფერენციაზე უცხოელი და ქართველი მომხსენებლების მოწვევა ხდება ინდივიდუალურად.
სოფლის ტურიზმის კონფერენციის თემა ყოველწლიურად განახლებადია. კონფერენცია აჭარაში უკვე ოთხჯერ ჩატარდა.
კონფერენციის ჩატარების შესახებ ინფორმაცია ეტაპობრივად განახლდება ვებგვერდზე www.batumiruralconf.com