გეოგრაფიული არეალი: საერთო ტრადიციული კერძები
ინგრედიენტები:
ფქვილი
კვერცხი
ერბო
რძე
მომზადების წესი:
ჩაფენილი ბორეგი
პურის ფქვილი მოვზილოთ, დავანაწილოთ გუნდებად და ფენებად გავიყვანოთ. ცალკე, ერბოში მოვხალოთ მჭადის ან პურის ფქვილი, შევურიოთ შაქარი და დანაყილი ნიგოზი. თითოეულ ფენას მოვაყაროთ გულსართი და დავახვიოთ. ხვეულები მრგვლად ჩავაფინოთ ბორეგ-სინში (სპილენძის სინი), შეივსება თუ არა, თავზე მომწვარ ერბოში შერეული წყალი ან რძე მოვასხათ და ღუმელში შევდგათ. როგორც კი თავი მოუწითლდება, ბორეგი მზადაა. ცხელივე დავჭრათ პატარა ულუფებად.
ყირყიტონა ბორეგი
პურის ფქვილის ცომი გავაბრტყელოთ, თხელ ფენად გავიყვანოთ, მოვაყაროთ შაქარი და ნიგოზი. დავახვიოთ ოქლაოზე - ცომის გასაყვან ჯოხზე, მივჭმუჭნოთ და ოქლაო გამოვაძროთ. გამზადებული ხვეულები ჩავაწყოთ სინში და ღუმელში გამოვაცხოთ. ცხელსვე მოვასხათ ცივი სიროფი.