ზამთრის ფესტივალი - გოდერძი

 

ბათუმისა და ქობულეთის ზაფხულის ფერადი ფესტივალების, გადამფრენ ფრინველებზე დაკვირვების და თბილ ქვეყნებში   გაცილების, ფესტივალ ,,განდაგანაზე" სოფელში ქალაქიდან გაუსვლელად  მოგზაურობისა და კონფერენციაზე სოფლის ტურიზმის განვითარებაზე სჯა-ბაასის შემდეგ- თოვლიანი, აჭარული ზამთრის დრო დგება. ეს სეზონიც არ არის გამონაკლისი და აჭარა ყოველწლიურად ზამთრის ფესტივალით ანებივრებს   ადგილობრივებსა და წლის ამ პერიოდში დასვენების მოყვარულებს. ღონისძიების  ძირითადი მიზანია მთის კურორტებზე -გოდერძსა და გომარდულზე ზამთრის სეზონის გახსნის დაანონსება და მათი პოპულარიზაცია.

ფესტივალის ფარგლებში ტერიტორია ზამთრის თემატიკის დეკორაციებითა და განათებით ეწყობა. იმართება ზამთრისათვის დამახასიათებელი სპორტული აქტივობები და შეჯიბრებები. პროფესიონალი მოთხილამურეები ფერადი კვამლით ეშვებიან სასრიალო ტრასიდან და ღონისძიებაც ოფიციალურად გახსნილად ცხადდება. 

 ღონისძიებისთვის განკუთვნილი ტერიტორიის ირგვლივ რკალისებრი ფორმით განლაგებული კვების ობიექტები მყუდრო გარემოს ქმნიან, სადაც შეგიძლიათ აიღოთ ცხელი ჩაი, ყავა, კაკაო ან გლინტვეინი, სიმბოლურ თანხად შეიძინოთ ჰოთ-დოგი და  გასათბობად კოცონს მიუსხდეთ. დეკორირებული სცენიდან კი მთელი დღის განმავლობაში   მოწვეული ბენდები იზრუნებენ თქვენს მუსიკალურ განწყობაზე.

კურორტზე ყოფნისას, საბაგირო გზით გასერნება არ უნდა გამოტოვოთ. ოღონდ  თან აუცილებლად იქონიეთ კარგად დამუხტული ტელეფონი ან ფოტოაპარატი და მოემზადეთ დათოვლილი მთებისა და სითეთრეში ჩაფლული მარადმწვანე ნაძვების გადასაღებად. ჰო, რაც მთავარია, გაითვალისწინეთ, რომ მიუხედავად ულამაზესი ხედებისა, რაც უფრო მაღლა ადიხართ, მით უფრო ცივა, ამიტომ არ დაგავიწყდეთ თბილი ხელთათმანებისა და კაშნეს თან წაღებაც. ზემოთ, საბაგიროდან გადმოსულებს, შესაძლოა, სულაც გაუკვალავი თოვლი დაგხვდეთ, სადაც მეგობრებთან ერთად გუნდაობასა და თოვლში ხტომასაც შეძლებთ. სრიალის მოყვარულებს კი სასრიალო ტრასიდან შეუძლიათ დაშვება, რომელიც ჯამში 8 კმ-ია და ამ მხრივ გამორჩეულია აჭარის სხვა სამთო-სათხილამურო კურორტებისგან.

საღამოს საათებში ელექტრონული მუსიკის დრო დგება, რომელსაც ადგილობრივი დიჯეები შემოგვთავაზებენ. შეგიძლიათ იცეკვოთ მეგობრებთან ერთად, დააგემოვნოთ კვების ობიექტების მიერ შემოთავაზებული სოფლის ნატურალური ჭაჭა, რომელიც კარგადაც გაგათბობთ და შესაბამის განწყობაზეც დაგაყენებთ, რათა გვიან ღამემდე აქტიურად გაერთოთ.

ღონისძიებას ასრულებს თოვლის ფანტელებში გასროლილი ულამაზესი ფოიერვერკი.

ზემოთ აღნიშნული ფესტივალები, ღონისძიებები და კონფერენცია მცირე ჩამონათვალია იმ ფაქტებს შორის, რაც ხაზს უსვამს, რომ აჭარის რეგიონი ოთხივე სეზონზე აქტიური კურორტია დასვენებისა თუ ოფიციალური შეხვედრებისთვის.

სხვა ღონისძიებები

ზაფხულის ფესტივალი

  აჭარა განსაკუთრებით ანებივრებს რეგიონში ჩამოსულ სტუმრებს ფესტივალებითა და სხვადასხვა კულტურუ

ფრინველებზე დაკვირვე...

  გადამფრენ ფრინველებზე დაკვირვების ფესტივალს 2012 წელს ჩაეყარა საფუძველი და  ყოველწლიურა

სოფლის ტურიზმის საერ...

  დღესდღეობით ტურიზმი ერთ-ერთი ყველაზე სწრაფად მზარდი სფეროა მსოფლიოში. ბოლო პერიოდში საკმაოდ

სოფლის ტურიზმის ფესტ...

   აჭარაში შემოდგომა მხოლოდ  მტევნებით დახუნძლულ ვაზსა და  ციტრუსის სავსე, ნარი

ქობულეთის ფესტივალი

  აჭარა განსაკუთრებით ანებივრებს რეგიონში ჩამოსულ სტუმრებს ფესტივალებითა და სხვადასხვა კულტურუ